«مش هيدخل يضرب اللعيبة قلمين».. مجدي عبد الغني يدافع عن بيبو بعد أنباء رحيله من الأهلي
دافع مجدي عبدالغني، نجم الأهلي السابق، عن خالد بيبو، مدير الكرة بالفريق الأول لكرة القدم بالنادي الأهلي، بعد الأنباء التي ترددت في الساعات الماضية حول رحيله من منصبه.
وقال مجدي عبدالغني، في تصريحات تلفزيونية عبر فضائية «الشمس»: «خالد بيبو، مالوش ضهر على السوشيال ميديا، زي غيره، وانتوا عارفين الناس دلوقتي بتشتري السوشيال ميديا عشان تهاجم ناس بعينها وأنا من ضمن الناس اللي بتتهاجم، أنا مش فارق معايا»
وأضاف: «هو خالد بيبو، في بطولة مخدهاش الموسم ده؟ لأ. هل كان في عقوبة لاعب يستحقها ولم يوقع عليه عقوبة وفقًا للائحة؟ لأ. لأنه ميقدرش يتغاضى عن عقوبة موجودة في اللائحة، هو ده نظام النادي الأهلي».
وتابع: «هل خالد بيبو، لازم يمسك عصاية ويضرب في اللعيبة عشان يبقى دكر؟ لأ. ميقدرش يعمل كده لأنه بيتعامل مع نجوم، وللأسف جمهور الأهلي الصغير في السن، خلوا اللعيب نجم قبل ما يلعب، هل بيبو، قصر في شغله؟ لأ».
وواصل: «إيه الحملة اللي على خالد بيبو دي! أنا ماليش علاقة بخالد بيبو ولا كولر، أنا بتكلم مش عشان شخص خالد بيبو، ولكن عشان أي حد هيجي يقعد في الأهلي عشرات السنين هيبقى عنده لوبي».
وأكمل: «أي حد بيجي يقعد سنين طويلة، لازم يبقى عنده لوبي وسوشيال ميديا، خالد بيبو، بقاله سنة، السنة اللي اشتغلها حقق إنجازات ولا النادي الأهلي خسر؟ ما ثابت البطل، كان مدير كرة واللعيبة بتخرج مش عاجبها التغييرات، هل هو كان بيضربهم؟ كان بيطبق اللائحة ويوقع عليهم عقوبات».
وزاد: «خالد بيبو، مش هيدخل يضرب لاعب قلمين عشان الكل يخاف منه ويتقال إنه قوي.. أنا عايز أفهم إيه سبب الاعتراض على خالد بيبو، وكل شوية يتقال إنه ماشي».
وأتم: «خالد بيبو، عمل كل حاجة مع الأهلي، أنا مش بدافع عنه أنا بدافع عن مكان وكيان ونظام موجود جوه النادي الأهلي عايزين يغيروه بلوبي السوشيال ميديا».
