«اعرف بتكلم مين أنا طوبة في الأهلي».. رسائل نارية من مجدي عبدالغني لمنتقديه بسبب بيبو
وجه مجدي عبدالغني، نجم النادي الأهلي السابق، رسائل نارية بسبب الانتقادات التي تعرض لها على مواقع التواصل الاجتماعي بعد دفاعه عن سيد عبدالحفيظ، مدير الكرة بالفريق الأول لكرة القدم بالنادي الأهلي.
وقال مجدي عبدالغني، في تصريحات تلفزيونية عبر فضائية «الشمس»: «أصحاب الكتائب، أعملكم ايه، أنا لما اتكلمت في الحلقة اللي فاتت عن خالد بيبو، ونزلت على السوشيال ميديا، لاقيت واحد كتبلي (انت مالك إنت)، أنا مالي أنا! شوفتوا الدماغ راحت فين، شوفتوا إحنا وصلنا لإيه، لما عيل صغير لما أنا كنت بلعب مكنش لسة اتولد، ده يعلق تعليق ويقولي إنت مالك، أنا مالي! أومال إنت اللي مالك، إنت مش عارف بتكلم مين».
وأضاف؛ «إنت مدرستش تاريخ يابني ولا إيه حكايتك، أنا مالي! يابني أنا طوبة في النادي الأهلي، إذا كان النادي الأهلي في سور ولا مبنى أنا طوبة شايلة المبنى ده زي ما الكابتن الخطيب، طوبة شايلة المبنى ده باللي عمله زي الكابتن مختار مختار وربيع ياسين وشوبير وشريف عبدالمنعم وثابت البطل وزي الكابتن إكرامي، أنا عملت زي ما الكباتن الكبار عملوا».
وتابع: «كل واحد عمل إنجازات حط لنفسه طوبة في جدار يحمل اسم النادي الأهلي، وتيجي تقولي إنت عملت إيه! إنت كل اللي عملته انك بتسقف وبتتنطط، اعرف إنت بتكلم مين قبل ما تقول إنت مالك، أنا لما بتكلم عن خالد بيبو، عارف أنا بقول إيه، أنا مفيش أي علاقة تربطني بخالد بيبو، ولا يوجد أي تواصل بينا»
وواصل: «أنا بتكلم حق ربنا، احنا ادينا سيد عبدالحفيظ، فرصة 10 سنين كمدير كرة وحقق نجاحات ولكن لما واحد تاني ياخد الفرصة تجرّبه سنة وتمشيه وهو بلغة الأرقام ناجح! يبقى حرام عليه كولر، لو هو اللي طالب ده».
