«أنا اتهانت واتظلمت».. تصريحات صادمة من نجم الإسماعيلي

أدلى أحمد محسن، لاعب الإسماعيلي، بتصريحات صادمة، واصفًا ما يحدث له بـ «الظلم والإهانة» في ظل استبعاده عن المشاركة، بقرار من المدير الفني، إيهاب جلال.

وأثار أحمد محسن الجدل، بعدما نشر عبر حسابه على «إنستجرام»، صورة قائمة الإسماعيلي أمام سموحة والتي تواجد بها، معلقًا: «كلام كذب أنا كلمتهم عشان أروح الماتش بلغوني إني مش موجود. أنا ممنوع من التمرين والماتشات».

وقال أحمد محسن في تصريحات عبر قناة «ETC»: «بقالنا 6 شهور بتمرن لوحدنا مش مع الفريق الأول، أنا وهاشم وباسم وكريم عرفات ومحمد حسن وصالح جمعة قبل ما يسافر».

وأضاف: «اسمي اتحط في القائمة فاتصلت بالإداري قالي أنت موجود، بعد كدة اتصل بيا بنص ساعة قالي أنت مش موجود. قلتله إزاي واسمي في القائمة؟، قالي الكابتن (إيهاب جلال) قال أنت مش موجود ومستبعد».

وأكمل: «أنا في طريقي لفسخ العقد، ممنوع من الماتشات مش باخد فلوس، مأخدتش %20 من عقدي من بداية الموسم، مشكلتي في النادي مش مشكلة فلوس مشكلتي إني مش باخد فرصة».

وتابع: «قولت لـ إيهاب جلال يا كابتن اديني أي حاجة، في كأس الرابطة سبني ألعب وأحكم على، قلت له أنت بتعمل معايا كدة ولعبت معاك في المقاصة، أنت هنا جاي بتهني وعارف إني مظلوم هنا وهو اللي قعدني وأنا كنت ماشي».

وأكمل: «أنا شيلت الليلة و3 لاعيبة كمان في مشروع بنبي الفريق فنقعد اللاعيبة الكبيرة اللي بتاخد فلوس، واحنا ولا بناخد فلوس ولا بناخد 2 جنيه في النادي. أنا اتظلمت واتهنت في الكورة ومأخدتش حق من حقوقي ومفيش حاجة تخليني أقعد في النادي»