«لمؤاخذة إحنا مش قاعدين».. نقاش ساخن على الهواء بين ثروت سويلم ونجم الأهلي السابق

دخل ثروت سويلم، عضو رابطة الأندية، في نقاش ساخن مع نجم الأهلي السابق، هاني العقبي، على الهواء، بسبب الحديث عن شكل الدوري بالموسم الجديد.

وقال هاني العقبي موجهًا سؤاله إلى ثروت سويلم: «حضراتكم المفروض هتحددوا شكل الدوري السنة الجاية. هل يعقل احنا لحد دلوقتي لسة هنقعد عشان نقرر أمال احنا السنة اللي فاتت كلها بنعمل إيه؟».

وأضاف في تصريحات عبر قناة «الشمس»: «إذ كنا لسة هنجتمع عشان حضراتكم تقرروا الدوري الجاي هيتعمل إزاي وقاعدين بقالكم سنة، الدوريات خلصت من 4 شهور واتحاد الكرة لغاية دلوقتي لسة بيجتمعوا عشان يشوفوا شكل الدوري السنة الجاية هو حضراتكم بتقعدوا بتعملوا إيه؟».

ليرد ثروت سويلم قائلًا: «مع احترامي لكلامك يا كابتن هاني، أنت متكلمش لمؤاخذة يعني بتقول إيه وتعملوا إيه؟ لا بعد إذنك إحنا مش قاعدين ده مش شغل تنفيذي ده شغل الرابطة، الدوري منتهي النهاردة أنت بتكلمني تقولي 3 و4 شهور».