لاعب الزمالك السابق: أشرف بن شرقي فشل برا.. ولازم يرجع يلعب سنة ببلاش

علق رضا العزب، لاعب الزمالك السابق، على غياب صفقات الفارس الأبيض حتى الآن، في ظل فتح باب الانتقالات الصيفية، مشيرًا إلى أشرف بن شرقي فلوسه قليلة لأنه لاعب فري، فما السبب وراء عدم التعاقد معه.

وقال العزب خلال تصريحات تليفزيونية عبر قناة النهار: «أشرف بن شرقي لاعب فري، ومجلس الزمالك الجديد تولى إدارة النادي وهو عارف المشاكل ووعد بصفقات، فين الصفقات لحد دلوقتي».

وأضاف: «بص وشوف النادي الاهلي اللي خد البطولات كلها السنادي وبيجيب ويدعم بلعيبة جديدة عشان يستمر على هذا المنوال المواسم القادمة، أما الزمالك بيدي وعود بصفقات جديدة ولحد دلوقتي مفيش أي حاجة، ويجوا يقولوا بن شرقي فلوسه قليلة طب فين».

وأكمل: «بن شرقي مخلي الزمالك أخر محطة، وحابب أقوله الزمالك هو اللي عملك، مشي وسابني ارجعه تاني ليه، المفروض أنه يرجع يلعب سنة ببلاش أنت مش لاقي نادي ومستواك متراجع وفشلت بعد مطلعت من الزمالك».

وزاد لاعب الزمالك السابق: «بن شرقي كان لعيب كبير وقدم مردود كويس مع الزمالك، ولكن دلوقتي أنا بقالك 3 سنين مش شايفك، عنده 30 سنة دلوقتي مش صغير، ولازم نعرف اللعيبة دي هتشيله ولا لا».

وأتم: «كله بيقول عايزين 10 و11 لعيب طب فين لحد دلوقتي مشوفناش أي حاجة، هات لعيب واحد حتى، مفيش فلوس في النادي، ولازم يبدأ يدعم بصفقات قوية».