«خدت خبطات كتيرة جدًا».. خالد بيبو يخرج عن صمته بسبب الهجوم الذي يتعرض له
رد خالد بيبو، مدير الكرة بالفريق الأول لكرة القدم بالنادي الأهلي، على الانتقادات التي تعرض لها في الفترة الماضية.
وقال خالد بيبو، في تصريحات تلفزيونية عبر فضائية «أون تايم سبورتس»: «دور مدير الكرة إيه، إنك متحسش بدوره أول ما تسمع صوته معنى كده أنه عنده مشاكل، دور مدير الكرة أنه يذلل كل العقبات للجهاز الفني واللاعبين حتى تكون الأمور هادئة».
وأضاف: «إنت طول الوقت حواليك دوشة من مباريات وقرارات، دوري إني لازم أوفر أجواء للاعبين إنهم يكونوا بعيدين عن تلك الظروف الصعبة عشان يركزوا في المباريات».
وتابع: «دوري إني أبعد اللعيبة عن زحمة المباريات والتصريحات، كأنك راكب العربية وقافل الزجاج، ومركز في شغلك»، مضيفًا: «ده كلفني كتير لأن الخبط كله كان فيا أنا، وده مش مشكلة أنا اتعودت على الكلام ده».
وواصل: «معنديش مشكلة إني أقابل أي حاجة وأواجه أي حد في سبيل إن مفيش لعيب عندي يتخدش أو لعيب عندي حد يحطه في جملة مفيدة طول الوقت».
وأكمل: «خدت خبطات كتيرة جدًا عشان أحمي اللاعيبة، والحمدالله النتيجة في الأخر فزنا بكل البطولات وده المهم، أنا صح بغض النظر عن أي حد تاني كان شايف إن أنا لازم أتخاطب مع الإعلام أكتر واطلع كلام عن العقوبات، أنا مبحبش الكلام ده ولو جاتلي فرصة 100 ألف مرة مش هعمل الكلام ده، لأن دوري أحمي اللاعيبة، إعلان العقوبات يعني إني بعرضهم للمساءلة من الجمهور والإعلام فكان دوري حمايتهم».
